التفاصيل الكاملة لرحلة (التغريبة السورية) من حلب الى السويد

تنشر "اقتصاد" قصّة هجرة سوريّ بدأت من حلب لتنتهي بالسويد في أوروبا بعد أن مرّ بعدد كبير من الدول العربية والأوروبية، كانت أبرزها تركيا والجزائر وليبيا وإيطاليا، ومن ثم عدد من الدول الأوروبية، وصولاً إلى وجهته الأخيرة.

صاحب التجربة، مالك كسار، كتب تجربته بالتفاصيل المملة، المالية منها والإنسانية، لذا ارتأينا في "اقتصاد" أن نعرض القصة كما هي دون أي تدخل من جانبنا، لأنها أقرب إلى السيرة الذاتية، وتتمتع بصياغة أقرب إلى العامية، مما يسهّل على القارئ المهتم مواصلة القصة دون ملل، حتى نهايتها.

القصة مفيدة للمهتمين بالهجرة إلى أوروبا، وهم باتوا يشكلون شريحة واسعة للغاية من السوريين في ظل الحرب المدمرة الدائرة في بلادهم.

نترككم مع قصة مالك كسار وقصة "تغريبته" من حلب إلى السويد، مرفقة بخريطة نشرها صاحب القصة.

"التفاصيل الكاملة لرحلة (التغريبة السورية) من حلب الى السويد.... بقلم مالك كسار

1. حلب - دمشق - عمان (الأردن) – اسطنبول (تركيا):

بدأت حكايتي بتاريخ 12-7-2012 من مدينتي الأم حلب.. في كراج البولمان جانب المتحف.. حيث فارقت أمي و لم يفارقني بعد وجهها السمح و عيونها المليئة بالدموع.. بدأت حكاية الرحيل عندما شعرت بالغربة داخل الوطن.. على الطريق الى دمشق أوقفنا حاجز طيّار .. صعد إلى الباص شاب لم يتجاوز الـ 12 سنة عندما شكّ بأن صاحب الصورة في الهوية ليس هو أنا.. و أنني عنصر مخابرات!! لقم الروسية في وجهي و أنا انظر بتحدي لمن أحسب أني بصفهم.. ولكن الحقيقة ليس أحد في صف السلاح على ما يبدو.. معجزة إلهية انقذتني و أكملت طريقي إلى دمشق و منها إلى عمان .. بقيت هناك عاماً كاملاً.. حيث لم تكن بلاد العربٍ أوطاني.. ولم تشفع لي شهادة الماجستير ولا أجادتي للغة الإنكليزية في إيجاد عمل محترم أفضل من (صبي تحضير شاي و قهوة).. رحلت إلى تركيا .. بلاد الباب العالي .. حيث تشابهت الظروف مع تحسن طفيف في مستوى المعاملة.. و لكن بقيت المشكلة أنني لا أجد وطني في كل حارات اسطنبول ولا أجد نفسي في كل مرايا الواقع الموجودة.. قررت الرحيل.. و كانت البداية من مطار اسطنبول..

2. اسطنبول (تركيا) - الجزائر (الجزائر):

بتاريخ 15-5-2014 توجهت الى مطار أتاتورك باستانبول للسفر الى الجزائر... شروط دخول السوري الى الجزائر: (تيكيت طيارة ذهاب/ إياب 500 $ + وجود مبلغ مالي 4000 $ كاش + وجود حجز فندقي و لو وهمي)..

للمقيمين في تركيا.. ديروا بالكن تنسوا تاخدوا دفتر الإقامة منشان ما يدفعوكون 370 ليرة تركية غرامة متل ما عملوا ب رفقاتي عند شباك الختم .. و أنا الله سترها معي انو بعرف تركي و فهمته للشرطي انو طلع بالسستم عندك بتلاقي الي إقامة و رقم وطني عندكون فنفدت و لحقت الطيارة عآخر لحظة!!

قبل ما نطلع عالطيارة بعتونا عند شخص جزائري بالمطار ألو مكتب لحالو تأكد من المبلغ و ختم عالحجز و التكيت و حط المصاري بظرف و ختمه و تعامله كان سيء و بلش يكفر و يعيط ﻷنو حطينا الشناتي جنب مكتبه (مخابرات).

طلعنا عالطيارة الجزائرية اللي بتشبه طيران الهوب هوب.. المضيفة بعد ساعة بلشت تاكل بزر .. وبعد شوي شلحت من رجلها و مدت رجليها و نامت و خنقتنا بالروايح .. بس حرام قدمولنا أكل و عصير.

لا حدا يشول ستر النجاة اللي تحت المقعد متل ما عملوا رفقاتي ﻷنو بنكشفوا عأجهزة الأشعة بمطار هواري بومدين .. وصار نكت ضلينا نضحك عليها يومين وقت سألوهم شو هي بالمطار.. و ربكم عداها على خير..

ضلينا 3 أيام بالعاصمة عند شب حلبي مقيم بالجزائر خجلنا من كتر كرمو الزائد جدآ و طيبة اخلاقه فتحية من القلب لك يا زياد حمدون..

3. الجزائر (الجزائر) – وادي سوف (الجزائر):

طلعنا جواً من العاصمة عمنطقة حدودية بالصحراء الجزائرية اسمها (وادي سوف) بكلفة 40 $.. بالمطار رجعني حارس البوابة رجعني ﻷنو ما اقتنع أنو رايح بتجارة ألبسة عهيك منطقة و طلب مني إقامة و تصريح عمل و و و و كمان عأخر لحظة .. لحقت الطيارة و رفقاتي اللي عبستنوني .. طلعنا عالطيارة ..

المحرك : هه هه هه هه هه هه هاه هاه هاه هاه فسسسسسسسسسس... عطلت الطيارة .. نزلوا انتقعوا بالمطار شي ساعتين لبين ما انصلحها .. مرة تانية رفقاتي شولوا ستر النجاة بس هل مرة نفدوا في مطار وادي سوف!!!

4. وادي سوف (الجزائر) – الدبداب (الجزائر):

التقينا بغروب عائلات شامية رايح لعند المهرب الجزائري محمد صالح عمنطقة الدبداب فطلعنا معون.. عالطريق قائد رحلتون طلع واحد سمسار ابن صرماية .. معرق منون شي 10.000 $ بين تيكيتات طيارة و حجز فندفي و كلفة تهريب. أخد منون 100 $ عتيكيت طيارة لوادي سوف و 50$ ﻷنو عطلت الطيارة !!! و 500 $ عإقامة فندق مليان صراصير و قايلون التهريب بالقارب بيكلف بين 2500-3000 $ و هوة بيكلف بس 1000 $.

سمعنا قصصون عن وحدة صبية بالعشرينات طالعة لحالها منشان تعمل لم شمل لزوجها المريض بسرطان الدم.. شاب عمره 15 سنة طالع لحالو كمان منشان نفس القصة.. و إمرأة حامل .. و نساء معون أطفال رضع . فقررنا نفهمون و نوعيهم عالنصب اللي عم يتعرضوا ألو و بالفعل .. قلبنا الطاولة على سمسار أكسراي الوسخ و فرطنالو نصبتوا…

الطريق طول 16 ساعة.. و بآخر حاجز للدرك الجزائري اخدولنا جوازات السفر بعد ما قلنالون انو نحنة رايحين نشتغل بشركة بتروجت السورية .. و أخدوا أوراق الباص من الشوفير اللي ما قللنا .. و اخدونا برجلينا على مخفر الدرك الوطني الجزائري و سلمونا هنيك بالمخفر.. نقعونا 7 ساعات تحت الشمس .. لبين ما صوروا الجوازت و فتحوا معنا تحقيق لكل شخص متل اتجاه اخواتك السياسي .. ﻷي طائفة بتنتمي ..

الضابط أول ما فتنا نحكي معو قال (كل اللي بجونا من سورية الأسد على راسنا من فوق) هون انا غصيت و طلعت لبرا و صرت فكر لوين رح يرجعوني؟؟ عالجوية و لا عالأمن السياسي!!

بعد ما شيكو مع العاصمة الجزائرية (يلي بنسقوا مع السفارة السورية بالجزائر) و تأكدوا.. فقلبت المعاملة و جابولنا أكل و بلش الدخان و المزح و رفيقي جابوله اركيلة كمان!! فهمونا انو هي منطقة عسكرية وأمنية و ممنوع ندخلها و هي اجراءات روتينية و هنن من خوفون علينا مسكونا و نصحونا ما نكمل عليها. أطلقوا سراحنا العصر على فندق بدون جوازات و تاني يوم اجى باص ليرحلنا على منطقة اسمها عين ميناس ..

5- الدبداب (الجزائر) – عين الميناس (الجزائر):

مافي 10 دقايق من مشية الباص اجت سيارات محمد صالح ووقفت الباص و طلع هوة و قال يالله انزلوا.. و اخدنا بسيارات لمكان امن .. بعدين لمكان تاني و الصبح حشكنا متل الغنم بسيارات جيب و انطلق فينا للطرف الليبي بعد ما اخد مننا 350 $ بعد ما كانت تسعيرته 200 $ بحجة انو الطريق خطر و في مصاريف الأكل و النقل!!

6. عين الميناس (الجزائر) - غدامس (ليبيا):

عالطرف الليبي استقبلنا شخص اسمو معتز راكب سيارة عليها شعار وزارة الدفاع الليبية/هيئة الأركان. اكتسفنا انو الشباب كلون مسلحين و روسيات و أحلى شباب .. كمل فينا الطريق على غدامس الليبية و استضافنا في بيته.. حوالي 60 شخص.. 20 مننا نساء و اطفال.. الأكل كان قليل و ما بكفي متل عند محمد صالح..

العصريات اندق الباب.. فتح واحد مننا شحطوه و حطوه بالسيارة.. اللي شايل كلاشيكوف سأله لرفيقي مين بالبيت؟ قلو عوائل سورية 20 رجل و 10 نسوان.. فقلو يعني (كل 2 على 1) .. أنا كنت نايم .. فقت عصوت إطلاق النار داخل البيت!! النسوان صارت تصرخ.. و الرجال بلشت تتشاهد و أنا نشف الدم بعروقي!! مضي الأمر عخير .. وراح معتز جبلنا رفقاته من الزنتان و معون كلاشيكوفات لداخل البيت منشان يحرسونا و بالسهرة بلشوا الشباب يلفوا صواريخ حشيش و نحنة بخرنا صدورنا بروائحها..

7. غدامس (ليبيا) – زوارة (ليبيا):

تاني يوم اخد مننا معتز 300 $ و طالعنا كلنا في براد لحمة الو فتحة تهوية صغيرة و باب سري و سدو قدامو بخشب منشان التفتيش.. انحشكنا كلنا 60 شخص ب مساحة 8x3 م و المكيف مطفي و صحراء ليبيا شمسها جهنم.. عالطريق عطل الباص و ضل الشوفير ناقعنا ساعة و نص و الباص واقف و شكلنا صار كل واحد كأنو معبيه ببرميل مي و الرضع بطلت تسكت و النسوان صارت تبكي و الرجال وجهوهم شحبت و الموت بقيلو شوي لحتى يخلص الأوكسجين الباقي.

طالعنا الشوفير بنص الطريق و اخدنا عند واحد صاحبو ليبي استضافنا بكرم لتاني يوم لبين ما جابوا سيارة شحن مكشوفة حشكونا فيها كمان و كملوا فينا ل (زوارة) بسيارات عادية كل 4 مع بعض.. لما وصلنا على (زوارة) تجمعنا في بيت المهرب حازم لبين ما يجي كل مهرب ياخود جماعته.. اخدنا شخص اسمو يوباس (اخوه لخليفة).. العائلات حطون بالفيلا الفارهة تبعو .. و نحنة اخدنا عبيت شخص شبه مجنون و المسدس عخصروا دومآ و بطالعوا في وشك اثناء حديثه العادي معك!! في ناس كان صرلها عندو 18 يوم عم تنتظر اكتمال العدد..

خليفة تعامله زفت و نفسية حقيرة.. البيت بزوارة ممنوع نفتح الشباك او نطالع صوت او نتصل او نتواصل مع حدا.. بعد يومين نقلنا للفيلا تبعوا بعد ما اخد من كل واحد 1000 $ و في ناس دافعه 1100 $ وفي ناس دافعة 1200 $ ظنآ منهم أنو المهرب عندو درجات سياحية!!! و هنيك كبوا غراض كل العالم إلا الشناتي الصغار..

و من هنيك حطونا كمان ببراد لحمة محشوكين شي نص ساعة و العرق غسلنا لنفطة التجمع عالشاطئ .. بقينا هنيك من العصر للساعة 12 باليل و البرد قتلنا .. مشينا شي 2 كم للبحر و دخلنا عليه برجلينا لعمق 1م لبين ماطلعنا على (بالم) وصلنا للقارب الأساسي و هنا كانت المفاجأة..

قارب خشبي بطول 17م و عرض 4 م محشوك فيه 280 شخص و تبين النا بعدين انو هنن 360 شخص.. الساعة 2 و انا يادوب بارك و الناس فوق رجلي و صدري مكبوس و عبتنفس بصعوبة و كل شوي يجي بالم فيه شي 50 شخص يحشكوون معنا .. بلشت العالم تتململ و تصيح فسحب واحد خرطوم و بلش يلط بالعالم.. في سوريين نزلوهم لجوا القارب مع الأفارقة و الباكستانيين اللي دافعين بس 400 $ مدري أقل!! و خليفة طلع عالقارب و سحب سكينة و هدد النسوان و ضربون بأيدو ﻷنو ما عم ينكبسوا منيح!! كتيرين دفعوا 25 $ لخليفة و ما عطاهم ستر نجاة!! هي من عدا أنو المهستر يوباس لم من كل السوريين أشفي معون دينار ليبي بحجة أنو منشان ما يرجعونا الطليان!!

8. زوارة (ليبيا) الى ميلان (ايطاليا):

مشي القارب الساعة 3 بالليل ورافقنا قارب المهربين بس 2 كم بعدين رجعوا متل الكلاب.. بسبب الحمولة الزائدة لمركب بستوعب 100 شخص طقوا الدعامات جوا القارب و بلش تسرب المياه .. و بعد ساعة قائد السفينة المصري طلب مننا نقوم و نطلع وين مضخة الضخ المسدودة بالطرف اليسار و نفتحها و إلا غرق المركب.. اكتشفنا لاحقآ انو هوة رفض يطلع يسوق المركب ﻷنو رح يغرق و مطالعينو غصب العنو تحت تهديد السلاح بعد ما كان محبوس بالمنفردة 15 يوم..

عند الفجر بلش الموج يعلى .. و المركب يعلى شي متر و يخبط عالمي و نطرطش مي .. بلشت العالم تراجع على حالها او عللي جمبها و اللي عملها على حالو و الروايح طلعت و الأفارقة اللي كانوا جوا طلعوا لفوق ﻷنو رح يموتوا من قلة الأوكسجين و المراجعة و البول مما زاد من حالة الكبس عكل الموجودين حتى الوقفة صارت صعبة!! الأفارقة بلشوا من اول ساعة يعبوا بيدونات مي و يكبوا لبرا و هاد الشي اللي خلى المركب ما يغرق..

بعد مضي 12 ساعة لاقينا منصة نفط جمبها سفينة إنقاذ .. فكرناها ايطالية قام طلعت تونسية!! اجت بارجة حربية كبيرة قربت مننا و تأكدت أننا لاجئين و قلنالون بدنا ايطاليا فبعدوا عناا.. سألونا إن كان المحرك عطلان او لازمنا شي.. قلنالون بس دلونا وين صارت إيطاليا ﻷنو قبطاننا جحش و ما معو جي بي اس و رصيد الثريا خلص بعد مكالمتين للبحرية الإيطالية..

اشرتلنا البارجة انو نلحقها.. و ضلت ماشية قدامنا 4 ساعات.. خلال هل وقت المحرك وقف مرتين و بلش يدخن و ازداد التسرب .. و العالم بلشت تقول سلمونا للتوانسة كرمال الله بطلنا نتحمل و ما بدنا نموت.. بلشت استعيد صور حلوة من ذاكرتي.. و أكرر آيات و قلبي عبرجف.. تشاهدت و طلعت عالسما و نطق قلبي.. يارب..

مافي دقائق طلعت في وجهنا ناقلة نفط و هون المحرك وقف خالص .. لفت البارجة التونسية علينا و اشرتلنا على البارجة الإيطالية ياللي اجت انقذتنا عأخر رمق.. طالعونا ع البارجة و المعاملة جيدة جدآ.. صورونا و صوروا جوازات السفر و كل شي غير سوري بصموه بالعشرة و السوريين و لا واحد بصم!! في ناس ادعوا انون سوريين و هنن توانسة و مصريين.. ما بعرف شلون كشفوهم بعدين!!

نقلونا على بارجة تانية باليوم التاني ضلينا على سطحها 24 ساعة بالنهار احترقنا و باليل بوظنا.. و نزلونا على شاطئ صقيلية بمرفأ finizia.. حطونا بكامب.. هربنا من قدام الشرطة بعد نص ساعة لكتانيا و من كتانيا لميلان..

9. ميلان (ايطاليا) – نيس (فرنسا):

اقمت أسبوع في ميلان.. و طبعاً لا بد من توجيه جزيل الشكر للدير المسيحي في سابونارو /ميلان على كرم الضيافة و حسن المعاملة..

حجزت بالقطار من ميلان إلى مدينة حدودية إيطالية مع فرنسا أسمها (فانتيميليا) ب 30 يورو و من فنتيمليا لنيس الفرنسية ب 7 يورو.. بلشت الرحلة الصبح .. الساعة تسعة من محطة ميلان سنتراليه .. لا تنسى تختم التيكيت من الماكينة اللي جمب الرصيف .. بالقطار عند الحدود طلعوا شرطة .. نظرة عالسريع و ما سألوا حدا لوين رايح!! ما بعرف يمكن الستايل الفانكي و الشورت و الهيتفون جاب ملامح إيطالية و التوفيق من الله أولاً و أخيراً .. بس عموماً إيطاليا كونترولها فلافل..

بدلت القطار في فنتيمليا و طلعت بقطار بلش يحكي فرنسي.. دخلنا نفق.. و طليت على مونتي كارلو.. و نيس و يا ويلاه ما أجملهم .. و خصوصي الشاطىء.. نزلت بنيس و الكونترول الفرنسي ما سألني عن التيكيت حتى .. الرحلة طولت 4 ساعات و نزلت بالمحطة و هون المفاجأة!! مافي حجز لأمستردام .. و مافي حجز على ليل (أخر مدينة في شمال فرنسا) و أنا بأقصى الجنوب.. قلت لحالي بطلع عالعاصمة و هنيك أكيد في كونيكشن أفضل..

10- نيس (فرنسا) – باريس (فرنسا):

قطعت لباريس .. و على الرغم أنو الرحلة طولها بس 6 ساعات بس التيكيت كان سعره 104 يورو!! ما بعرف بس أكيد اللي بحجز قبل بساعة هيك بصير فيه .. المهم تعلموا تحجزا و تخططو لمسارات القطارات قبل ما تطلعوا عالنت.. لباريس الطريق سهل.. بس المفتش شيك عالتيكيت و عالختم تبع الماكينة.. نزلت في محطة أسمها Paris Gare Lyon و هية المحطة الرئيسية و كتير كبيرة و بتضيع.. خبروني أنو أخر رحلة لأمستردام بتطلع مع محطة الشمال Paris Nord الساعة 10 المسا و كانت الساعة معي 9.45...

رحت على مكاتب الموظفين لاقيتون مسكرين .. الماكينات في حجز لبكرا الصبح .. كلو مسدد و رحلة وحدة على أمستردام الساعة 4 بالليل ..أمري لله منستنى .. جينا عالدفع .. بدها كريدت كارد و مامعي غير كاش .. حكيت مع ناس لاقيتون عم يدفعوا .. أنو يشترولي و بعطيون و فرجيتون أنو معي فوق الألف يورو .. بس للأسف نسيت شغلة كتير بكرهها في أوروبة و الغرب عموماً أنو (مافي شي لله) و اللي بكون بعمل لله في بلاده مع الزمن بصير متل الأوروبيين.. (و كتير من اصدقائي أكتشفت فيون هل فيروس و خسروا كتير من رصيدون عندي بسبب تطبعهم بهل طباع (الوجودية-الدنيوية) فعلاً و أن كان بالقول فقط .. للعلم بالشيء يعني)..

المهم .. الواقع قدامي بيقلك عندك ليلة تشرد في شوارع باريس .. همت على وجهي في العاصمة التي لا تنام.. مافي نت.. مافي رصيد.. زحمة.. شعب ما بحكي إنكليزي.. زبالة في كل مكان و مشردين نايمين عزيق الرصيف.. و حتى في الأماكن السياحية.. تعبت من المشي و قررت اللجوء إلى شي جامع.. عسى و لعل ألاقي حدا بعمل شي لله في بلاد كل مين أيدو ألو!!

طلعت مع تكسي قلتلو بتعرف إنكليزي.. قلي شوي.. قلتلوا خدني على أقرب جامع.. ما طول المشوار 5 دقايق طلع العداد 12 يورو!!! وصلت على شي أسمو مسجد باريس الكبير.. كانت الساعة 11.30 وقت صلاة العشاء.. صليت و بعد الصلاة بلشت صافح الأخوة:

الأول : السلام عليكم أخي .. أنا من سورية و بدي ... (الله يعاونك أخي) و هرب!! أنا أجتني الصدمة .. أنو ليش فكرني عبشحد و أنا معي أكتر من اللي خلفوا!!

التاني : أخي الكريم.. أنا جيت عباريس و ما بقدر بحجز بأوتيل.. في مكان أو بالجامع بقدر أنام اليوم!؟ قلي أية ليش لأ.. بحجزلك بأوتيل ما بطلب هوية.. قلت يالله يالله.. قلي دقيقيتن و برجعلك.. وغط نص ساعة و هاد وجه الضيف!!!

رحت لعند خادم الجامع قلتلو: السلام عليكم.. قلي و عليكم السلام و الإيمان و السماحة عبشرشر من فمه الفواح بالمسواك.. قلتله: أنا سوري.. لسع ما كملت كلامي.. عبس و قلي منقدرش ننيمك هنا.. تفضل لبرا لو سمحت!!!

طلعت لصحن الجامع و رفعت راسي.. و قلت يارب.. وطيت راسي و قلت بصوت خافت حسبي الله و نعم الوكيل .. سمعت صوت رد "هو حسبنا أخي".. أندرت لورا.. لاقيت شخص ملتحي قلي سمعت حديثك مع خادم الجامع.. تعال معي.. عالطريق طلع شخص تونسي اسمه فيصل قاعد عند صاحبو بغرفة مساحتها 15م أجارها 700 يورو.. قلي أنا من كل قلبي بدي ساعدك و نيمك عنا بس بدي أستأذن صاحب البيت لأنو أنا ضيف عندو.. ابتسمت و قلتلو ما بهمني لو ما رضي.. بكفي أنو كلامك نساني كل تعبي و عندي استطاعة ضل للصبح عبمشي.. ابتسم و ضل مكمل تسبيحوا طول الطريق بدون ما يحكي معي أو يستفسر مني عن أي شي.. عالطريق صرت أحدث نفسي.. و عرفت حقاً ليش الفقراء أحباء الله في كل الأديان..

دخلت عبيتو المتواضع بعد ما أنصدمت بضيق المكان و مستوى الفقر.. ضل هوة فايق منشان أتمدد أنا على الديوانية اللي بتسعه فقط و أخوه على التانية!! و نيمني ساعتين لصلاة الفجر.. ضل يبحبش عالنت ع حل آلي و فيقني.. صلينا الفجر في جامع قريب و قلي بالقطار 233 يورو و حرام.. لاقيتلك سيارة رايحة على أمستردام بدو 40 يورو بوصلك لهنيك.. بس المشكلة ما عندي كريدت كارد!!

تذكرت وجود صديقة شهمة موفدة بباريس.. فيقنا لصاحبة القلب الكبير الساعة 5 الفجر و طلبت منها تدفعلي لهل رحلة على هل حساب .. بمجرد ما أندفع المبلغ وصلتني رسالة موجود فيها رقم هاتف صاحب السيارة و كود ما عرفت ليش (بعدين بحكيلكون)..

فيصل التونسي وصلني لمحطة شارل ديغول و علمني شلون كمل على باغي دي ماغيوت هنيك كاتب أنو الشوفير بدو ينطلق الساعة 7.. وصلت لهنيك و السيارة فيات فيها 8 ركاب (4 شباب و 4 صبايا) .. 6 من ورا و تنين قدام .. و كالعادة المكان الفاضي قدام جمب الشباك على حظي..

11. باريس (فرنسا) – امستردام (هولندة):

طلعت بالسيارة جمب صبية طلعت بتعرف إنكليزي و الحمدلله .. أول سؤال بتسألني ياه منين حضرتك!؟ ما بعرف ليش خلال جزء من الثانية نطقت برياحة أني من (اليونان) ! ابتسمت و قالتلي سعيدة بمعرفتك .. أهلا و سهلا .. و في قلبي (ولي لو بتعرف يوناني.. و الله لأتبهدل)!! عالطريق فوراً صار أتستراد.. و بلشوا يحكو الكل بالفرنسي.. وقت مليت تتحارشني جولييت على شو دارس و شو رايح تساوي بأمستردام.. بالنتيجة و لأنو الكذب بتحول لفلم هندي.. صار أسمي (مالكوس كساريكوس) من أثينا و دارس آثار بجامعة بان أثينايكوس (فريق كرة قدم يوناني شهير) بس الفلم مأكشن.. و ما حسيت و الحمدلله عالطريق..

كان أغلب الحديث بين جولييت و الشوفير بالفرنسي عن سوء منطقة الشنغن.. و ليش مافي حدود بين الدول!! و سويسرا هي الوحيدة اللي بتفهم و هلق إن أجى أرهابيين من سورية بيقدرو يتجولوا وين ما بدون.. و ليش مافي كونترول!! و أنا قلبي عمبدق بسرعة و أقول: ولي إذا وقفنا حدا و عرفوا أني سوري!! و الله ليطالعوني أسامة بن لادن بذاتو.. طبعاً لا تسألوا شلون فهمت محور الحديث.. لأنو كان فيو كلمات( سيغيان.. تيغوغيست.. فغونتييغ.. الخ)..

شاورت عقلي مرتين كلاتة.. أنو لازم صارحون.. مدري لأنو مالي ثقة أنو رح تتيسر أن كذبت مدري لأنو هرمونات الذكور ما بتتحمل الكذب على صبية حلوة متل جولييت و أنا قلبي خلقة صغير و لا يتسع سوى لزهرتين من كل الحديقة.. متل ما بتعرفوا يعني!! المهم.. شاورت المقربين.. كل واحد زت رأي.. استقر الرأي أخيراً أنو اللي نجاني من الموت بالقارب مارح ينساني بهيك شدة.. وقررت كمل الكذبة و شارك بالحديث و أمزح و ربي يسر..

أول ما دخلنا بلجيكا صار الطريق محفر.. و بلشت السيارة تطجطج!! قلت يا حبيبي أحلى بلد للجوء بشرفي.. ما حبيتها ولا حبيت طرقها.. عالطريق الكونترول عبارة عن تمهل و جسر عليه كاميرات.. يقطعو الشوفير و يكمل بسرعة فوق 100.. بس عند طلعنا من فرنسا مد أيدو للشباك و معو جهاز.. زمرت الماكينة و فتحت حاجز.. و قطشوا منو 3 يورو..

طلعنا من باريس لحدود هولندا اشتهيت أشوف شرطي واحد!! ولا سيارة شرطة!! بلدان ماشية على أنظمة ألكترونية للمراقبة و ضبط الحوادث و الشبهة و التفتيش.. عند أول دخلة هولندا بلش الخضار الحلو و لوحة ( فيلكوم نيدرلاند ) وهون المفاجأة!!

كونترول هولندي بطريقة غير مباشرة و بشكل ذكي و مبتكر!! الطريق كان أوتستراد و عريض .. فجأة صار ديق و السيارات صارت تمشي مجبرة بسرعة 15 و توقف كل 50 م بسبب إنسداد الطريق!! بالأول فكرت حادث.. لكن وقت شفت أنو الشغلة طولت نص ساعة و الطابور طولو 2 كم عصني قلبي.. وتأكدت من شكوكي وقت بلشت موتورات شرطة هولندية تتفتل بيناتنا ببطىء و تطلع شو في جوات السيارات.. أنا هون حسيت عالصواب .. قلت شقدي غبي ليش ما طلعت بالقطار.. و بسرعة فكرت بالحلول لأنو مارح أنفد.. بشرتي سمرة و ملامحي عربية وراكب قدام من طرف الباب و مارح يشفعلي الشورت و الهيتفون و جولييت اللي جمبي..

بلشت أتململ و قلتلها لجوليت نعست.. شو هل مسخرة.. هاد طريق دولي و عيب هيك!! اتمسخرت و قالتلي حتى تعرف قيمة فرنسا!! (قلتلها بقلبي دخيل فرنسا لأجلك).. ساويت حالي نايم حتى سيطر على توتري و دقات قلبي اللي صارت مليار.. و بزيق عيني على المراية اليمين.. انتبهت على واحد مبين أنو رح يركز على سيارتنا لأنو اتفحص كل الركاب اللي ورا بديران راسو.. بجزء من الثانية.. رخيت راسي على كتفها.. و أنا عم سب ضرورات الموقف بقلبي.. و هو ينشد (سجل أنا عربي).. و الله محيي معلقة العرب!! نقزت المسكينة و كان معدي ابن الحرام .. و قالتلي بخجل بعد ما فتحت عيوني و عبرتلها بملامحي أني متفاجىء و أسف و هية كررت بتوتر ووشها أحمر: لامشكلة لا مشكلة!! اعتذرت وقلتلها تعبت و غفيت.. رجعت كررت أنو لا مشكلة.. و أنا عبحمدالله أنو عدينا.. يا ميسر.. يارب..

ضل الطريق هيك مسافة 3 كم.. و طول ساعة.. و مارجع عرض الطريق لبين ما مشيوا كل موتورات الشرطة اللي كانت عم تفتل بيناتنا.. و طلعت قارمة مكتوب عليها تحويلة أمستردام عاليمين عاليسار روتردام.. وصلنا شبين على روتردام.. و طولنا ساعة من روتردام لأمستردام.. دخلنا أمستردام و طول الطريق بقلبي عمبتمسخر على إيطاليا و فرنسا بالمقارنة مع جمال هولندا على كافة الأصعدة.. اشتهيت أشوف شرطي واحد أو سيارة شرطة خلال تجوالي لمدة ساعتين.. بلد عبمشي الكل عالنظام فلا داعي للمراقبين إلا للضرورة..

أمستردام مدينة بتعشقها من أول نظرة .. متل ما كرهت باريس من أول نظرة.. بعد ما وصلنا.. ناولني الشوفير هاتفو الذكي و مفتوحة صفحة الموقع من حسابو و في مكان للكود تبعي.. و بمجرد ما حطيت الكود و كبست موافق كتبلي.. تمت عملية دفع ال 40 يورو بنجاح.. http://www.blablacar.com/

12. امستردام (هولندة) – كولن (ألمانيا) – ميونيخ (ألمانيا):

أنطلقت صباحاً من أمستردام إلى كولن حيث تنتظرني أختي الرائعة.. تأخرت على المحطة.. و نسيت أختم البطاقة.. صعدت إلى القطار و حضر المفتش.. ولم يسألني عن مخالفة.. فقط الإبتسامة هي جواز سفرك في بلاد الكفار!! و ما أروعها من بلاد!!! كانت اللافتات مكتوبة باللغة الهولندية.. فجأة تصبح بالألماني .. لا وجود للحدود .. كما تقول الأغنية بلاد أوروبا أوطاني من ميلان إلى أوسلو .. و من براتيسلافا إلى بروكسل!! في كولن التقيت مع أختي العزيزة و الرائعة.. و رأيت ألمانيا بضحكاتها.. أكملت طريقي في حافلة (باص) من كولن إلى ميونخ .. داخل الباص يوجد إنترنت مجاني و بوفيه لمن يرغب بوجبة أندومي أو سنكرز أو بيرة.. وصلت إلى ميونخ و في استقبالي الدكتور ثائر.. و كم هو جميل أن تلتقي بوطنك في الغربة...

13. ميونخ (ألمانيا) – هامبورغ (ألمانيا) - فردريشا (الدانمارك) - كوبنهاغن (الدانمارك) - مالمو (السويد):

حجزت بطاقة قطار كاملة من (ميونخ/المانيا) ل (مالمو/السويد) فرد سحبة مروراً ب كوبنهاغن (الدانمارك).. و كسرت كل التوصيات الخاصة بغروبات الهجرة... و طلعت بقطار دولي.. اللي كتيرين حذروني أنو بطلع تفتيش فيو و ممكن انكمش.. بس أنا كان الي هدف من هل شي و هو : ضمان العودة ﻷلمانيا في حال توقفت في الدنمارك أو في حال ما دخلت عالسويد.. ﻷنو لو قطعت بطاقة من )ميونخ/ ألمانيا( ل )كوبنهاغن /الدانمارك(.. و بطاقة في (كوبنهاجن/ الدانمارك) ل (مالمو/السويد) و انكمشت عالحدود فرح ارجع للدنمارك و أبصم فيها و ما أحسن أعمل لجوء بالسويد أو المانيا.. انتبهوا على هل نقطة.. و الشغلة التانية موضوع أني مالي خايف من شي ﻷنو أصلآ الحيرة بين اللجوء بالسويد و ألمانيا بتوجع الراس كتير..

المهم .. قطعت أول تيكيت من ميونخ لهامبورغ ب 99 € و هاد سعر خيالي لمسافة مو بعيدة كتير و طولت 4 ساعات بالقطار .. و التاني من هامبورغ لمالمو و هاد المخوطر فيو .. و بيعدي من فردريشا الدنماركية لكوبنهاغن وصولاً لمالمو .. المفاجأة انو سعر هل تيكيت العابر للدول 39 € !!!!

مشيت الأمور بخير لحد فلينسبرغ الحدودية بين ألمانيا و الدانمارك.. وقف القطار ربع ساعة و بعدين تغيرت اسماء المدن و طلوا بقرات الدنمارك اللي بجي لونون بني و ابيض.. بالمحطات الدنماركية مافي شرطة طاول ومافي موظفين و مافي ناس .. أهلا بكم في اسكندنافيا .. اخدم نفسك بنفسك..

بمحطة كوبنهاجن لازم اخود قطار لمالمو .. قام طلع عمال القطارات عاملين اضراب!! عصني قلبي و قلت في شي مو لله .. طالعونا بباص على حسابون من العاصمة الدنماركية كوبنهاغن لمدينة مالمو السويدية .. المسافة بالقطار نص ساعة و عالجسر اللي بربط بين الدولتين نفس الشي.. المفاجأة انو بأخر الجسر طلع حاجز دانماركي.. مد الشوفير بطاقة قام فتح .. بعدين في سيارات شرطة دانماركية واقفة بالعرض قبل لافتة أهلآ بكم بالسويد .. طلب منا ان نوقف و طلع عالباص.. طلعت عاليمين و اليسار لاقيت كل الباص بيضان و شعرون أشقر .. إلا أنا شعري اسود و ملامحي عربية.. قلت خلص.. انجاب اجلي و رح اعلق عند (البقرة الضاحكة)..

بحركة انسحالية غطست لتحت الكرسي.. و السويدية اللي جمبي طلعت بزيق عينا و ضحكت.. كشفتك يا مندس.. بس عادي.. و بالمناسبة البركة جنب البنات مفيد جداً للتعاطف.. الله ستر انو اكتفى الشرطي بنظرة من بعيد.. مشي الباص أخيراً.. و لاحظت أنو كانوا موقفين سيارة فيها سوريين و عبفتشوهم تحت لافتة أهلآ بكم في السويد!!!

الله نفدني و الحمدلله و صرت بالسويد بتاريخ 18-6-2014.. بس نصيحة للمغامرين: لا تسلكوا طريق السيارات... القطارات القصيرة الغير دولية أفضل بكثير.. و اللي بدو يتفهمن و يحط 700 - 800 يورو و يطلع من فرنسا للسويد بتكسي خاصة عن طريق ألمانيا على اعتبار أئمن.. يفكر باحتمال النصب من شباب المغرب العربي!! لذلك بنصحه يقطع ب 80 يورو قطار دولي من فرنسا لألمانيا و يسلم حالو بالمانيا لأنو رح ينكمش بنسبة 98% بالقطار لأتو الكونترول بالقطارات الدولية عالي كثير و اللجوء في ألمانيا أو السويد بيختلف حسب رغبة الشخص بين المعيشة الأفضل و أو الجنسية الأسرع:

ألمانيا = إقامة مؤقتة - جنسية بعد 8 سنوات - بلد اقتصادي - فرص عمل أكثر ..
السويد = إقامة دائمة - جنسية بعد 4 سنوات - بلد كئبب - فرص عمل أقل..

و في كل بلد بيكون فيو القانون عالجميع رح ترتاح…

بقلم مالك كسار

خطوط التنقل في الخريطة المرفقة:
- الخضراء:سفر بري
- الحمراء: سفر جوي
- السوداء: سفر بحري
- الزرقاء: سفر سككي".

ترك تعليق

التعليق